As transferencias bancarias cambian dende hoxe, 9 de xaneiro. O motivo é unha nova normativa aprobada pola Unión Europea que busca homoxeneizar o envío de diñeiro en toda a Zona SEPA.
O obxectivo final é «crear un mercado integrado de transferencias inmediatas» e, para conseguilo, como indica o regulamento, é necesario que «as operacións se procesen de conformidade cun conxunto común de normas e requisitos». A nova norma equipara os dous tipos principais de transferencias que existían ata agora:
• As transferencias ordinarias, que chegan nun prazo de 24 a 48 horas.
• As transferencias inmediatas, que permiten recibir o diñeiro no momento, pero que ata agora tiñan un custo adicional.
Por que son importantes as transferencias inmediatas?
Imaxina que necesitas facer un pago urxente ou que agardas recibir a túa nómina xusto o día no que vencen algúns recibos importantes. En España, aínda hai moitas persoas que teñen que agardar horas ou mesmo días para que o diñeiro chegue ás súas contas. Esta situación, ademais de frustrante, pode complicar a xestión económica de miles de familias.
A nova norma busca solucionar este problema permitindo que o diñeiro chegue en 10 segundos como máximo. Ademais, quen envíe a transferencia recibirá unha confirmación inmediata de que a operación se realizou correctamente. Sen dúbida, un servizo deseñado para cumprir coas demandas de inmediatez que tanto valoramos hoxe en dí
A preocupación polas estafas: estamos realmente protexidos?
Ata agora, o gran punto débil das transferencias bancarias foron as operacións fraudulentas. Aquí é onde esta normativa pretende marcar a diferenza. Unha das medidas máis destacadas é a verificación do nome do destinatario, algo que actualmente non se fai e que facilita as estafas, como a suplantación de identidade de empresas, entidades financeiras ou persoas particulares.
Desde ADICAE Galicia, queremos expresar a nosa preocupación ao respecto. Recibimos numerosas consultas de persoas afectadas por ciberestafas relacionadas coas transferencias bancarias. Aínda que as medidas incluídas na normativa –como a verificación do destinatario e as compensacións por parte das entidades en caso de fraude– parecen prometedoras, pregúntamonos se realmente lograrán reducir o número de casos.
Unha medida adicional que consideramos de gran utilidade para previr estafas é a posibilidade de establecer un límite máximo para o importe das transferencias. Isto pódese solicitar por escrito ao banco ou nalgúns casos pódese xestionar directamente desde a aplicación móbil da túa entidade bancaria. Este límite permite reducir o importe máximo dunha transferencia, funcionando como unha capa extra de seguridade que pode evitar grandes perdas económicas no caso dunha fraude.
Ademais, se un banco detecta unha operación fraudulenta e non actúa de forma adecuada, estará obrigado a compensar á persoa consumidora polos prexuízos económicos sufridos.
E as comisións?
Outro aspecto que preocupa ás persoas consumidoras é o custo deste servizo. Segundo o establecido, as transferencias inmediatas poderán ter un custo similar ao das transferencias non instantáneas. Por iso, será clave revisar as condicións de cada banco para entender se este servizo implicará un custo adicional.
(Se tes dúbidas sobre as condicións do teu contrato, xa sabes onde estamos! Podes facernos a consulta a través do apartado de INFORMACIÓN – CONSULTA nesta páxina web ou escribíndonos directamente a galicia@adicae.net)
Unha oportunidade, pero tamén un desafío
A posibilidade de enviar e recibir diñeiro en cuestión de segundos é, sen dúbida, unha mellora significativa para as persoas usuarias. Porén, a súa implementación presenta retos importantes, especialmente en termos de seguridade e accesibilidade para todas as persoas consumidoras.
En ADICAE Galicia, estaremos atentos a como evolucionan estas medidas, porque aínda que a norma promete maior seguridade e axilidade, queda por ver se a súa aplicación estará á altura das expectativas e realmente logrará reducir os riscos de fraude.
Que opinas destas novas medidas? Cres que realmente solucionarán os problemas actuais ou que aínda queda camiño por percorrer?